Tranona mpanakanto iray no lasibatry ny jiolahy omaly tao amin’ny Cité Lazaret Atsimo. Voaroba ihany koa ny “cyber-café” iray tao amin’ny Cité ouvrière.
Tsy misy andro tsy hahenoana trano voaroba na trano nidiran’ny mpangalatra ao Antsiranana tato ho ato. Tranona mpihira malaza anankiray no lasibatry ny jiolahy omaly tamin’ny 1 ora sy sasany maraina tao amin’ny Cité SIM-Lazaret-atsimo.
Nisy jiro nirehitra eo an-tokontany saingy nesorin-dry zalahy moramora ny takamoa, avy eo nosokiriny tamin’ny baramina ny varavarana. Tora-bato variraraka no nanakanany ireo olona sasany amin’ny efitra mifampitohy mba tsy hivoaka ny trano.
Vono sy daroka avy eo no nihatra tamin’ny rain’ilay mpanakanto sy ny zandriny lahy rehefa tafiditra an-trano ireo jiolahy. Tsindrona baramina tamin’ny ranjony no azon’ny rahalahin’ilay mpanakanto raha ratra be teo amin’ny lohany no nanjo ny rainy. Very tao anatin’ity fanafihana ity ny solosaina sy ny finday tao amin’ilay tokantrano voatafika.
Fantatra ihany koa fa tokantrano telo nifanakaiky tamin’ilay tranona mpanakanto no efa saika lasibatry ny jiolahy tamin’io fotoana io. Saingy tsy lasa lavitra ireo mpanao ratsy noho ny antsoantso efa nivoaka tao amin’ny trano voatafika voalohany.
Fisafoana
Nitrangana fanafihana ihany koa afak’omaly tao amin’ny Cité ouvrière, ary irony «cyber café» irony indray no notafihan’ny jiolahy. Lasa daholo ireo solosaina rehetra tao amin’ilay toerana. Ankoatra ireo ny tranga vao tsy ela tany Lazaret-avaratra sy Tanambao-5.
Tsy vitan’ny manafika fotsiny ireto mpandroba sy mpangalatra ireto fa mampitahotra mihitsy tahaka ireny dahalo ireny. Andefasan’izy ireo hafatra avy amina finday takona anarana ny mponina alohan’ny hanafihany. «Ho avy tsy hoe ela izahay hitsidika ny tokan-tranonao», no hafatra fohy alefan’izy ireo.
Mandry an-driran’antsy araka izany ny mponina ao Antsiranana. Manao fisafoana ihany ireo mpitandro ny filaminana, saingy toa tsy mahataitra ireo olon-dratsy izany. Tsy ampy fitaovana rahateo izy ireo ka toa tsy ahoan’ireo jiolahy ny hetsika ataony.